Trashi, kampioni përshendet të kuqtë
Partizani shpartallon Vllazinë (3-0) dhe mbyll llogaritë si me europën duke mos e arritur atë, ashtu dhe me zonën play-off.
Edicion i cili konsiderohet tërësisht zhgënjyes jo vetëm me objektivët sezonalë të paarritur por dhe me zgjedhjet italiane në pankinë apo elementët që afroi në start të edicionit.
Asani i huazuar në Suedi te AIK, pasohet së fundi me lamtumirën e një tjetri kampioni nga ‘dinastia Gega’. Është 28 vjeçari Trashi…
Një postim i Lorenc Trashit në “Instagram”, teksa ka publikuar foto me gjithë ekipin duket një mesazh i pastër lamtumire.
Futbollisti nga Gramshi pasi ka shkëlqyer me Partizanin për disa vite, me të cilin fitoi edhe një titull kampion e kapi kombëtaren, do të largohet drejt kuvajtit për tu bashkuar me Al Qadisen
“Shpresoj të takohemi sërish në një të ardhme të afërt. Të gjitha kujtimet e çmuara, që kemi kaluar bashkë do i vë në ‘kornizë’. Më shumë se një familje”, shkruan Lorenc Trashi.
Me Al Qadisa, në Kuvajt, mbrojtësi i majtë, ka firmosur për pesë vitet e ardhshme për një shifer prej 200 mijë eurove në sezon. Partizani pranoi verdiktin duke përfituar nga kjo lëvizje 250 mijë euro.