Volejbolli “ngec në rrjetën” e Covid-19!…
● Komiteti Ekzekutiv i Federatës Shqiptare të Volejbollit, për shkak të pandemisë globale shkaktuar nga koronavirusi, vendosi mbylljen e kampionateve kombëtare për sezonin 2019-2020. Erzeni për meshkuj dhe Mirdita për femra, shpallen kampionë kombëtarë
Ashtu sikurse ishte vendosur në asamable, Komiteti Ekzekutiv i Federatës Shqiptare të Volejbollit, pasi nuk ka arritur deri më 23 qershor marrjen e lejes nga qeveria për rifillimin e aktiviteteve në salla të mbyllura, ka zyrtarizuar përfundimin e kampionateve kombëtare për sezonin 2019-2020 dhe ka dhënë verdiktet e edicionit të mbyllur.
Ja njoftimi i plotë i Federatës Shqiptare të Volejbollit:
“Në vijim të situatës së pandryshuar për shkak të COVID-19 e duke qenë se deri më sot është akoma në fuqi Urdhëri i MSHMS, Nr.326, Datë 15/05/2020, “Për kufizimin e aktiviteteve sportive në sallat e mbyllura”, si dhe në respekt të skadencës së vendosur nga Asambleja e 31-të e FSHV-së për datën 23 qershor 2020, Komiteti Ekzekutiv vendosi ta konsiderojë zyrtarisht të përfunduar sezonin sportiv 2019-2020 e duke u bazuar në klasifikimet, shpall fituesit për femra, meshkuj, U-21 e U-20 si më poshtë: 1. Mirdita, fitues tek femra A1; 2. Agritourism Huqi, fitues tek femra A2; 3. Erzeni, fitues tek meshkuj A1; 4. Skenderbeu, fitues tek U-20 (të reja); 5. Farka Volley, fitues tek U-21 (të rinj). Duke iu referuar klasifikimeve në momentin e nderprerjes për kategoritë përkatëse, femra e meshkuj, Komiteti Ekzekutiv vendosi gjithashtu që ekipet fitues, së bashku me ekipet e tjera, si edhe me fituesit e Kupës së Shqiperise do të kenë të drejten të marrin pjesë në Kupat e Evropës, sipas rregullave dhe kuotave të percaktuara nga CEV-i. Ekipet të cilët dëshirojnë të marrin pjesë në Kupat e Evropës, duhet të shprehin interesin e tyre dhe të dorëzojnë e dokumentacionin e plotë pranë Sekretariatit të FSHV-së brenda dates 15 korrik 2020. Duke shpresuar që kjo situatë pandemie të mos perseritet më kurrë, ju urojmë shëndet e suksese në sezonin e ardhshëm! Sekretariati i FSHV-së”, shkruan FSHV në faqen e saj zyrtare.
Gjatë asamblesë të zhvilluar ditë më pare, ishte vendosur gjithashtu shkrirja në një kategori të vetme e grupeve A1 dhe A2 për femra për edicionin 2020-2021.
