Ademi: ‘Pagat peng i Këshillit Bashkiak’
Alarmi i prapambetjes së pagave te klubi Vllaznia merr dimensione të mëdha. Ndalesa për të dytën ditë radhazi të daljes në seancë përgatitore e kryesisht kërkesa pa kompromis e futbollistëve për ti shkuar deri në fund bojkotit, nëse nuk zgjidhet problemi, kanë shtyrë krerët institucionalë të ndalen seriozisht.
Është kryetarja e Bashkisë Shkodër, Voltana Ademi e cila fajson Këshillin Bashkiak të drejtuar nga Brisela Kadia. Sipas Ademit, Këshilli Bashkiak, nuk ka lëvruar fondet që janë miratuar në dhjetorin e vitit 2019 për klubin Vllzania.
“Bashkia e Shkodrës ka miratuar Buxhetin për vitin 2020 për Klubin e Futbollit Vllaznia sh.a. që në dhjetor të vitit 2019. Jemi në fund të muajit maj 2020 dhe këshilli bashkiak akoma nuk ka shqyrtuar dhe miratuar pasqyrat financiare të KF Vllaznia sh.a., duke bllokuar vijimësinë e pagesave që nga muaji shkurt dhe deri në këtë moment që jemi, 22 maj 2020.
Në muajin shkurt, ka patur një përpjekje nga ana juaj për zhbllokimin e situatës tek KF Vllaznia sh.a., por vetëm aq. Në momentin që flasim, futbollistët, stafi tekniko- sportiv, trajnerët e Akademisë dhe punëtorët e terreneve sportive, nuk kanë mundur të marrin pagat e tyre. E gjithë kjo, ka krijuar një situatë të rëndë që rrezikon të ketë impakt edhe në pjesën sportive, të rezultateve dhe objektivave për të gjitha ekipet e KF Vllaznia sh.a. në kompeticionet ku marrin pjesë.
Dua të vazhdoj të besoj që nuk ka ndonjë keqdashje në këtë zvarritje që po i bëhet zhbllokimit të financimit të punës së sportistëve dhe stafit të KF Vllaznia sh.a.
Në këto kushte, kërkoj nga ana juaj, me urgjencë dhe pa vonesa, shqyrtimin dhe miratimin e pasqyrave financiare, ne një mbledhje të thirrur nga Administratori i K.F.”Vllaznia”, për t’i hapur rrugën vijimin në normalitet të punës tek Klubi kuqeblu, i cili siç edhe klubet e tjera, kanë kaluar jo pak probleme edhe për shkak të pandemisë dhe Gjendjes së Fatkeqësisë Natyrore.
Siç jeni në dijeni, sezoni futbollistik rifillon me 3 qershor ndërsa ekipet kanë nisur stërvitjen. Kësisoj, si Kryetare e Bashkisë Shkodër, duke përcjellë zërin e sportistëve dhe tifozerisë, kërkoj reagimin me përgjegjësi nga ana juaj.” – shkruhet ne letrën e Ademit, drejtuar kryetares se Keshillit Bashkiak Shkoder, Brisela Kadia.
