Vllaznia, “çeta e vogël” me 4 futbollistë…
● Pas të rinjve Herald Marku dhe Dajan Shehi, sot kanë rinovuar kontratat edhe kapiteni Gilman Lika dhe mbrojtësi Renato Malota
Sot Vllaznia është zgjuar. Ka zyrtarizuar kontratat me dy nga lojtarët më të rëndësishëm të skuadrës shkodrane sezonin e shkuar. Kështu ka rinovuar me kapitenin Gilman Lika, si dhe me mbrojtësin lezhjan, Renato Malota.
Kësisoj, pas ditës së sotme, skuadra e Vllaznisë ka në organikën e saj 4 futbollistë të zyrtarizuar. Pas afrimeve të futbollistëve të rinj Herald Marku dhe Dajan Shehi, drejtuesit e klubit shkodran kanë menduar të rinovojnë me dy veteranë, kapitenin Lika dhe mbrojtësin Malota.
Në ditët e ardhshme, thuhet në postimin e bërë në faqen zyrtare të klubit Vllaznia, do të bëhet edhe rinovimi i kontratave me futbollistë të tjerë të trashëguar nga sezoni i kaluar, si dhe do të afrohen lojtarë të rinj në radhët e Vllaznisë.