Lerda: Sfida e parë, vendimtare…
● Sot në orën 17 30, në “Selman Stërmasi” të kryeqytetit, takimi i parë kualifikues në Champions League, Partizani -Karabak.
Pas triumfit të Shkendijës së Tetoves dje ndaj Nome Kalju të Estonisë në Ligën e Kampionëve 0-1 dhe barazimit spektakolar të Feronikelit po dje ndaj TNS në Uells 2-2, sot radha e skuadrës tjetër shqipëtare në UEFA Champions League.
Do të jenë kampionët e Superiores së Shqipërisë, Partizani, ndërsa në orën 17:30 do të presë në “Selman Stërmasi”, Karabak të Azerbajxhanit.
Ndërkaq në prag të turit të parë kualifikues në UEFA Champions League, në kampin e kuq janë të bindur se performanca e Partizanit, do të jetë e destinuar drejt lojës së bukur, pse jo dhe rezultative.
E tha trajneri Franko Lerda, që së bashku me shumë futbollistë të tjerë, u bë pjesë e kampionëve të Shqipërisë këtë verë. Duket se stafi teknik beson fort te paraqitja në miqësorën e fundit të fituar ndaj Krakovës 0-1 me gol të Kardozos në të 76’.
Emra të shumtë nga merkatoja, por në fund Lerda duket se do i besojë më së shumti futbollistëve të edicionit të kaluar, me të cilët Partizani u shpall kampion për herë të 16-të.
Formacionin dje e la enigmë. Me shprehjen “e kam në kokë”, Lerda kaloi te pyetja e radhës. Përballë, Karabaku me histori të madhe dhe kualitete për t’u patur në konsideratë.
Mjafton të kujtosh faktin që vetëm futbollisti i tyre Riçard Almeida, kushton 1.6 milione euro. Gjithsesi, Partizani ka gjithë të drejtën e botës të provojë kualifikimin.
Së paku të realizojë atë që deklaroi italiani i pankines së kuqe në konferencën për shtyp, ndërsa në përgjigje të objektivit për këtë takim, u shpreh:
“Të shohim, të luajmë ndeshjen e parë. Pastaj do të bëjmë llogaritë. Ndeshja e kthimit varet nga ajo që do bëjmë nesër. Do e shohim si ndeshje të vetme, fokusi është te sfida e nesërme”-deklaronte tekniku dje.