Barcelona-Ajaks, dashuri e hershme…
● Pas mesfushori De Jong dhe qendërmrojtësi De Ligt gati të nënshkruajë për katalanasit. Ditët e ardhshme pritet zyrtarizimi
Dashuria midis Barcelonës dhe Ajaksit është e hershme. Ajo lidhet me emrin e Johan Krujfit, një legjendë në futbollin botëror. Holandezi “fluturues”, është një nga arkitektët e Barcelonës së sotme. Mentaliteti, filozofia e lojës se tij vazhdojnë edhe sot të jetë “busull” në akademinë “La Masia” të katalanasve.
Barcelona e Mesit me shokët, zhgënjeu në gjysmëfinalen e Championsit ndaj Liverpulit dhe u eliminuar në “Anfild Roud”, pas një kryevepre të “reds”-ave të Klopit. Por kjo nuk do të thotë se katalanasit janë dorëzuar. Ata po punojnë për sezonin e ardhshëm dhe kanë nisur përforcimin e skuadrës.
“Supermarketi” i tyre, Ajaksi. Mesfushori i talentuar, Frenki De Jong, i cili të dielën mbush 22 vjeç, tashmë mund të konsiderohet i Barcelonës. Ai ka nënshkruar kontratë me katalanasit, madje dhe është ndarë me tifozët e Ajaksit, që e përcollën me ovacione për kontributin që ka dhënë për skuadrën e “harkëtarëve”.
Por të dielën në “Johan Krujf Arena”, ku Ajaksi pas fitores 4-1 ndaj Utrehtit siguroi titullin kampion të Holandës, në stadium ishin të pranishëm edhe emisarët katalanas.
Synimi i tyre është qendërmbrojtësi Mathijs de Ligt, që edhe pse ende nuk i ka mbushur të 20 vitet, aksionet e tij janë rritur mjaft pas performancës së Ajaksit në Champions.
Thuhet se katalanasit janë gati të japin 70-75 milionë euro për mbrojtësin De Ligt, me të cilin dhe menaxherin e tij Raiola, parimisht është rënë dakort. Tani mbetet të nënshkruhet kontrata dhe të zyrtarizohet edhe kalimi i mbrojtësit të ri të talentuar në radhët e Barcelonës.
Katalanasit, nga udhëtimi në Amsterdan, po kthehen mesa duket në Barcelonë me një paketë të talentuarish, mesfushorin De Jong dhe mbrojtësin De Ligt.