Mesi, vjen çertifikimi katalanas…
● Në muajin maj, në Katalunjë,”jashtëtokosori” do dekorohet jashtë praktikave të deritanishme. Kurrë më parë një dekoratë e tillë në duart e një sportisti.
E përditshmja sportive “Mundo Deportivo”, bën të ditur, se qeveria e Katalunjës në bashkëpunim me bashkinë e Barcelonës, kanë vendosur t’i akordojnë Lionel Mesit titullin e lartë “Creu de Sant Jordi”. Çmimi prestigjioz i jepet personave që kanë kontribute në ruajtjen e identitetit, integritetin dhe zhvillimin e Katalunjës.
Çmimi në trajtën e një super dekorate, do t’i dorëzohet argjentinasit gjatë muajit maj. Motivacioni: “I njohur si futbollisti më i mirë i të gjitha kohërave. Lionel Mesi, mishëron atribute të mëdha sociale e sportive. Ai simbolizon përulësinë, ndershmërinë, të mësuarit, kreativitetin, shpirtin e ekipit dhe respektin”.
Në këtë mënyrë gjeniu i dekades së fundit në futboll, përpos shumë titujeve dhe arritjeve në sport, do t’i shtojë vetes këtë super “trofe” që në Katalunjë, vështirë ta fitojë çdokush.
