“Kam sulmin më të mirë në Shqipëri”…
![](https://sportiim.al/wp-content/uploads/2019/04/gjoka.png)
● Edhe pse me mungesa, trajneri i kuksianëve, Ernest Gjoka, është i sigurtë se skuadra e tij do të bëjë më të mirën për të siguruar finalen e Kupës
Trajneri Ernest Gjoka, në konferencën për shtyp në prag të ndeshjes së parë gjysmëfinale për Kupën e Shqipërisë, ka folur për situatën e Kukësit. Ai do të ketë mungesa shumë të rëndësishme në gjysmëfinalen e parë të Kupës së Shqipërisë ndaj Skënderbeut, por trajneri Gjoka nuk mendon se mund të jenë alibi, përkundrazi shpreh bindjen e plotë se ekipi me potencialin që ka në fazën sulmuese, do t’ia dalë mbanë.
Mungesat dhe besimi: “Vendi i parë në kampionat është larg, ndaj kupa merr rëndësi të dyfishtë. Do të mundohemi të bëjmë mirë dhe të vazhdojmë përpara. Mungesat janë problem shumë i madh: Shameti, Uilliam Kordeiro, Valdet Rama, Dzaria, Maliqi, Musolli. Gjithsesi, kam besim, sepse këto ndeshje janë përmbledhja e një viti me sakrifica. Kam shpresë të madhe se nëse do jemi kompaktë pas, duke pasur lojtarët që kemi përpara mund të shënojmë gjithnjë”.
Presidenti Gjici kërkues: “Ai kërkon gjithnjë sukses dhe na kërkon të kualifikohemi. Ai priste të luftonim për titull, është i bindur se duhet të luftojmë deri në fund edhe në kampionat. Pak zhgënjim ka pasur, por nëse fitojmë Kupën kjo skuadër ka të ardhme të rëndësishme dhe pak përforcime do i duhen. Duhet kujdes, për të mos pësuar gol në radhë të parë, sepse janë ndeshje specifike, duhet të mendojmë edhe për kthimin”.
Përvoja e Skënderbeut: “Klub i madh, me skuadër cilësore dhe eksperiencë e mentalitet fituesi, por edhe ne nuk mbetemi pas në këtë drejtim. Skënderbeu më i dobët? E vërtetë, por ka ende disa lojtarë me eksperiencë e shumë cilësi. Këto janë ndeshje ku vendos përvoja, ndaj duhet vlerësim maksimal”.
Tifozët: “Na duhet shtëpi, Kamza është zgjedhja ideale. Tifozët nuk vijnë dot në Elbasan e Shkodër, Kamza është e vetmja alternativë ku kemi tifozët më vete. Natyrisht, fusha nuk është super, por do ta kompensojnë tifozët”.
Reginaldo-Shkurtaj: “Është fat i madh që kam gjetur këtu Rexhinaldon, e doja që kur isha herën e fundit të Kukësi, por dhe Shkurtajn, dy sulmuesit më të mirë në Shqipëri. Janë lojtarë me tipare të ndryshme, por do mundohem t’u marr maksimumin, duke luajtur bashkë. Janë dy shënuesit më të mirë, me thoni kush janë mbi ta. Do ta shihni që shumë shpejt do kemi një sulm edhe më të fortë”.