Shpëtim Duro: Të kalojmë moldavët më pas mendojmë për…
Do të jetë e njëjta skuadër, i njëjti trajner, e njëjta fushë (Elbasan Arena), i njëjti kompeticion (Conference League).Një vit më parë në këtë tur, Laçi me Duron në timon, mposhti 1-0 Universitatea Krajovë e pas 0-0 në Rumani, kalon në raundin e tretë. Për herë të parë në histori.
Duket fotokopje, veçse këtë radhë, 0-0 ndaj Petrokub e ndeshjes së parë duhet kaluar. Me një gjysmë goli…
Ndërkohë, një ditë para finales për biletën kualifikuese tekniku i sprovuar, ndër më të mirët në tregun shqiptar, beson se vetëm me zbatim të përpiktë të detyrave në fushë mund të shkohet larg.
Sot teksa u pyet nga ‘Sportiim.al’, trajneri i bardhezinjëve nuk zbuloi shumë detaje por la të kuptohej se e kishte ‘kopsitur’ si duhet 11-ën me të cilët do të zbresë në fushë.
Duro:
Vjen Petrokub, është gati Laçi për të kaluar si sezonin e kaluar?
“Sigurisht deri tani skuadra ka bërë mirë. Shpresojmë të bëjmë mirë edhe ndeshjen e nesërme për të përsëritur edicionin e kaluar”.
Moldavët nga Hinçesti shpesh në të vajtjes sulmonin me 4-5 forca. Keni një plan mbrojtje -sulm?
“Sigurisht që ndeshjen e parë, 30 minutat e para nuk sulmohet me 4-5 por u prishën ekuilibrat. Kundërshtari u mbështet edhe nga tifozeria e shumtë dhe me shumë forca në sulm sepse u prishën ekuilibrat e lojës. Ishte minuta e 28′-të dhe ishim të detyruar të mbronim, të ndërronim strategji duke u mbrojtur poshtë.”
Të gjithë pyesin se kush do ta bëjë Spahiun (i pezulluar) nesër në “Elbasan Arena”...
“Patjetër është një mungesë e rëndësishme momentalisht sepse ne kemi patur defiçite në mesin e fushës dhe Spahiu është një futbollist aktualisht shumë i rëndësishëm por do mundohemi të bëjmë diçka për ta zëvendësuar sepse jemi para këtij fakti.”
Fehervar apo siç njihej dikur Videoton, rivali në turin e tretë…e mendoni?
“Ne nuk duhet të mendojmë, duhet të përqëndrohemi te ndeshja e nesërme se është një kundërshtar që duhet respektuar në maksimum pavarësisht rezultatit të ndeshjes së parë.” Intervistoi: Isuf Myrtaj