Duka, status special për Vllazninë femra
Vllaznia e bën rrugë. E dyta fitore historike e Vllaznisë së femrave në UEFA Women’s Champions League ndaj kampioneve turke ALG Spor Kulubu me penallti, ka lumturuar edhe presidentin e FSHF-së njëherazi tifoz i deklaruar i shkodranëve Armand Duka i cili ka uruar Vllazinë në rrjete:
“Jashtëzakonisht i lumtur me fitoren e sotme të Vllaznisë në turin e parë kualifikues të UEFA Women’s Champions League ndaj kampiones së Turqisë, ALG Spor Kulubu! Ka qenë një ndeshje vërtetë emocionuese dhe e luftuar deri në fund.
Një arritje e shkëlqyer për vajzat kuqeblu, por edhe për futbollin e femrave. Le të shpresojmë që ky sukses të pasohet nga të tjera triumfe dhe Vllaznia të avancojë në fazën e grupeve të Champions League për femra.
Do të ishte një sukses i merituar për këtë ekip, por që njëkohësisht tregon se futbolli i femrave në Shqipëri është rritur në aspektin cilësor vitet e fundit. Urimet më të mira për drejtuesit e klubit, stafin teknik dhe shpresoj që Vllaznia të vazhdojë të jetë një burim frymëzimi për të gjitha vajzat që duan të luajnë futboll! Jemi krenar për ju!”, shkruan Armand Duka në Facebook.
