Vendimi i Apelit një “quitz”, nuk falet Malota
Sot është mbledhur Komisioni i Apelit pranë FSHF-së, i cili ka analizuar pretendimet e futbollistëve apo zyrtarëve të klubeve të ndëshkuarve nga Komisioni i Disiplinës. Në përfundim të mbledhjes së tij, Komisioni i Apelit ka marrë një vendim, që përveç vendosmërisë për të mos falur, i ngjan mjaft një “qiutz”-i. Ja çfarë shkruhet në vendimin e Apelit në fjalë:
Komisioni i Apelit në FSHF, në mbledhjen e tij të 16.07.2020, me vendim nr.10, vendosi:
1. Lënien në fuqi të vendimit Nr. 33, datë 07.07.2020 (pika 2) të Komisionit të Disiplinës.
2. Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
As më pak dhe as më shumë, me shumë gjasa, bëhet fjalë për futbollistin e Vllaznisë, Renato Malota. Mbrojtësi shkodran në ndeshjen ndaj Luftëtarit në Gjirokastër, ka lënë fushën e lojës i ndëshkuar me karton të kuq. Komisioni i Disiplinës, për gjestin e kryer e ka dënuar atë me 4 ndeshje pezullim nga kampionati.
Mesa duket, Malota e ka apeluar masën e marrë ndaj tij, por Apeli nuk e ka marrë parasysh kërkesën e lojtarit dhe ka lënë në fuqi vendimin e Disiplinës. Veç për ta marrë vesh një gjë të tillë, duhet të zgjidhësh “quiz”-in se për çfarë bëhet fjalë, që për ta ankimuar këtë vendim, duhet t’i drejtohesh CAS-it në Lozanë.
Ja çfarë thuhet në pikën 2 të vendimit nr.33 (07.07.2020) të Komisionit të Disiplinës?:
2. Lojtari i KF Vllaznia, Renato Malota, për sjellje josportive ndaj zyrtarit të ndeshjes, në bazë të Nenit 48/1/a të KDS dënohet me 4 (katër) ndeshje pezullim nga aktiviteti futbollistik.
