Dinamo, gati sponsorë italianë…
Dinamo shpejt me sponsor të ri. Ky është lajmi më i freskët dhe shumë i mirë për tifozët blu, teksa skuadra emblemë e kryeqytetit, prej vitesh dergjet në Kategori të Parë.
Lajmin se skuadrën e Dinamos mund ta marrin sponsorë nga Italia, e ka dhënë i ftuari i moderatores Erga Kruja në ‘Rubrikën Sportive’ në Radio Tirana, Edmond Muhametaj.
Ndërsa emisioni po shkonte drejt fundit, Muhametaj, deklaroi se ka një lajm të mirë për tifozët e një skuadre të Kategorisë së Parë.
Pas këmbënguljes së drejtuesës së emisionit, Muhametaj tha se Dinamo e Tiranës, pritet që së shpejti të bëhët me sponsorë seriozë duke saktësuar edhe adresën e tyre.
“ Kam një lajm ekskluziv për Rubrikën Sportive. Një ekip legjendë e Kategorisë së Parë, do kthehet në një klub të fuqishëm. Është Dinamo e Tiranës. Kaq mund t’ju thëm për momentin”- deklaroi gazetari Edmond Muhametaj i cili për ‘Sporti im.al’, shtoi se sponsorët e rinj që po interesohen për blutë, janë italianë.