Inter ofron 60 mln., Junajtid kërkon 80…

Inter dhe Mançester Junajtid prej kohësh janë në luftë nervash dhe transaksionesh të vështira. “Zikaltrit” e Milanos kërkojnë të bëjnë të tyre dhe të përfitojnë nga shërbimet e sulmuesit belg Romelu Lukaku.

Trajneri Konte e pëlqen dhe këmbëngul për belgun. Nevoja për të bëhet akoma më e madhe, pas “divorcit” me Ikardin, ku Lukaku shihet si zëvendësues i denjë për këtë post. Edhe sulmuesi belg dëshiron të largohet nga “Old Trafford”.

Problemi është tek anglezët. “Djajtë” e Mançesterit duan të përfitojnë sa më tepër financiarisht nga ky okazion. Sipas “Sky Sport”, drejtuesit e Junajtid kanë refuzuar ofertën prej 60 milionë eurosh të Interit për Lukakun.

Gjatë ditëve në vazhdim pritet një ofertë e re nga “zikaltrit” e Milanos, pasi thuhet, se anglezët janë të gatshëm ta mbyllin transaksionin dhe ta lenë të lire Romelu Lukakun për 80 milionë euro.

Për rastësi, sot Mançester Junajtid u ndesh me Interin në turneun “International Champions Cup”. “Djajtë” fituan 1-0 me gol të Grinvud (76’). Sulmuesi belg Lukaku, ndenji gjatë ne korridore për ta pritur dhe për t’i dhënë dorën Antonio Kontes, trajnerit të “zikaltërve”.