Partizani dhe Laçi, hapin javën e 31-të
● Nesër në mbrëmje, Partizani pret bardhezinjtë në duelin për t’u afruar me titullin. Kurbinasit, shansi i fundit për Europën.
Partizani prej javësh, bën gati festën e rikthimit te titulli kampion, por me 6 javë deri në fund, diferenca prej 10 pikësh me Kukësin, ende duhet konsideruar si pjesë e matematikes. Në fakt, të kuqtë do të startojnë javën pikërisht nesër në shtëpi.
Përballë do kenë laçianët e fortë dhe të destinuar të luajnë deri në fund, për një vënd që të dërgon në kupat e Europës. Megjithatë “dëmat”, përpos seancave stërvitore të javës, kanë deklaruar se takimi me bardhezinjtë, është i gjithi për t’u vlerësuar. E tha Trashi dhe më pas mbrojtësit Kalari dhe veterani nga Prishtina Ibrahimi, i cili kthehet nga pezullimi.
Ky i fundit në një intervistë për Supersport, tha se Partizani po ecën e sigurtë drejt titullit kampion, teksa ndeshja me Laçin, është e vështirë. Partizani vjen në këtë takim me dy mungesa thelbësore në prapavijë, pasi Atanda dhe Rexhepi, janë të pezulluar.
Ndërkohë, në kampin bardhezi, situata është më e qetë. Së paku në kontigjent, aty ku trajneri Starova, duket se ka disa alternativa. Në dyshim Fangaj.
Fitorja e fundit ndaj Skënderbeut në shtëpi, i ka rritur shanset që Laçi të mendojë seriozisht mundësinë e një bilete për në Europa League. Nisur këtu, sfida e nesërme më Partizanin, në kryeqytet, mund të konsiderohet determinante për objektivin e tyre parësor.
Takimi Partizani-Laçi, i vlefshëm për javën e 31-të të Kategorsë Superiore, do të luhet të shtunën në “Selman Stërmasi”, në program në orën 19:00.