Shqipëria U21: Ftohet Redon Xhixha
Nga: Isuf Myrtaj
Ndërsa Kombëtarja e madhe do të presë Turqinë në Shkodër me 22 mars, për llogari të kualifikueseve të Euro 2020 , edhe Shqipëria U21, luan përballë homologëve të tyre nga Turqia.
Tekniku Alban Bushi, ka ditë që ka publikuar listën e futbollistëve të grumbulluar për dy ndeshjet që kuqezinjtë luajnë javën tjetër, ndërkohë që sot, ka një tjetër zhvillim tek moshat.
Pas dëmtimit të shkodranit Rubin Hebaj, tekniku i U21 Alban Bushi, ka operuar me shpejtësi dhe zgjidhja vjen nga Laçi. Sulmuesi bardhezi Redon Xhixha, edhe pse po vuan javët e fundit për të gjetur golin në kampionat, ka treguar se është një lojtar mjaft kualitativ dhe i zoti për të bërë mirë.
Në fakt, në radhët e kurbinasëve figurojnë disa futbollistë me moshë të re dhe veç Selmanit, Mersinajt dhe së fundi Xhixhës dhe Fangaj në linjën e djathtë të mbrojtjes, ka mbajtur peshë të madhe te Laçi.
Gjithsesi, Bushi i ka dhënë mundësi djaloshit kurbinas për të asistuar me grupin e Shqiperisë deri në moshën 21 vjeç.
Ndeshja mes Shqipërisë dhe Turqisë U21, do të luhet ditën e shtunë, në datën 23 mars, në stadiumin “Elbasan Arena”.