Dramë dhe polemika, befason Skënderbeu…

Në Durrës, Teuta – Skënderbeu 2-2

Ndeshja e dytë e ditës, ajo mes Teutes dhe Skënderbeut, përfundoi në shifra  të barabartë, 2-2. Në “Niko Dovana” të Durrësit, përpos spektaklit në fushë  dhënë nga skuadrat, ajo që bezdisi jo pak, kishte të bënte me gabimet  arbitrare.

Sërish gjyqtari Kola protagonist, i cili sikurse dy  javë më parë, gabon rëndë në dy raste. Për fatin e keq të tij, rasti i penalltisë në favor të  Teutës dhe aksioni i golit të barazimit nga korçarët, e “nxinë” më shumë xhaketën e “zezë’.

Sidoqoftë, në aspektin sportiv, Teuta duket se humbi dy pikë. Bregdetarët në avantazh të dy golave, u kapen “mat” në pjesën e mbetur nga “ujqërit’, teksa falë përvojës që mbartin, shënuan aq  sa  iu  duhej për të dalë të pamundur.

Orges  Shehi, tekniku i Skënderbeut, u shfaq i pari në konferëncë për shtyp. Pas ndeshjës ai  u ndal te shpirti i grupit duke shtuar se reagimi i skuadrës,  meriton komplimente.

Tekniku korçar, i tha hapur objeksionet lidhur me  rastin e penalltisë në dëm të të tijve ndërsa tha: “Po e shoh dhe tani rastin në monitor, por isha i bindur që në mometin e parë gjatë lojës. Vetëm ndonjë që nuk ka parë futboll, thotë se ky rast është penallti. Jam shumë i kënaqur nga skuadra. Reagimi, por dhe pika e marrë sot, na shton besimin që të bëjmë më mirë në vijim”.

 Ndërkohë Bledi Shkëmbi, ndërsa sheh t’i ikin dy pikë nga duart, qan momentin e fund-takimit teksa aksioni i korçarëve, sipas tij, u nis nga një  faull i pa akorduar.

“E nisëm mirë, por fundi ishte dramatik. Në fazën mbrojtëse, Osmani dhe Arapi, kishin probleme fizike, por nuk pata zgjidhje më të mira, kështu  që  vëndosa t’i mbaja në lojë. Ruajmë vendin e tretë dhe ky është i vetmi moment që na inkurajon. Do punojmë gjatë javës për të rregulluar disa  mangësi. Jemi optimistë që skuadra do të ruajë vazhdimësinë e  rezultateve  pozitive, ”- tha Shkëmbi.