Frikë dhe “tym”, Tirana fiton tifozët…
Derbi pa fitues, Tirana- Partizani 0-0
Nga Isuf Myrtaj
Nëse ju kishte marrë malli për një stadium shqiptar, i gjithi i mbushur, ai ishte sonte në mbrëmje. “Selman Stërmasi” u bë dëshmitar i një prej netëve magjike që shpaloset në tribuna.
Me reflektorët ndezur, Tirana e Partizani, u hodhën në fushë, me synimin për t’i rrëmbyer mbrëmjen njëra-tjetrës, mirepo kjo gjë, nuk ndodhi. E kujdesshme Tirana, e cila në harkun kohor të 45 minutave, bëri goxha për të gjetur avantazhin. Ngo i Tiranës dhe portieri Hoxha për Partizanin, në këtë fraksion, patën duele të ndezura mes tyre, me anglezin, që nuk arriti ta kalojë në dy raste të pastra kapitenin e kuq. Deçiziv.
Në të dytën, skuadra e Gegës, riparoi mjaftueshëm repartet, bashkëpunimin mes tyre. Nga ana tjetër vëndasit e Tiranës, u dukën disi më të kondicionuar nga mendësia për të mos e humbur derbin. Dhe nuk kishin faj…! Rreth 8 mijë tifozë bardheblu, kurrësesi nuk mund të kapërdinin një dështim të radhës. Sidomos në derbi, aty ku “gjakrat”, janë të nxehtë në 365 ditë. Gjithsesi ka drithërima, teksa në fund, një top “dredharak”, shkoi te shtylla e Abibit.
Derbi numër 153, ashtu siç nisi. 0-0- e denjë.
Ardian Mema, u shfaq gazmor në fund të takimit. Së paku si trajner, në takimin e tij të dytë në një ndeshje derbi, ia arriti të dalë i pamundur nga Partizani.
Ka kohë dhe për batuta, ndërsa thotë se të ishte ndeshje në ring, skuadra e tij do kishte fituar me pikë. Për të nënkuptuar se Tirana, sipas Memes, ka luajtur më mirë.
“Kam ardhur në mes të kampionatit dhe nuk kam pasur shumë kohë, por gjërat te Tirana janë rregulluar në masë. Ekipi ka ekuilibër. Po luajmë futboll të mirë. Kjo më ka pëlqyer sot.
“Ndoshta skuadra dha çdo gjë pjesën e parë. Gjithsesi edhe Partizani është një ekip i fortë dhe ata dinë si të reagojnë pas gabimeve. Në pjesën e parë bëmë mirë me manovrat tona. Sulmuam shumë nga krahët me Hoxhallarin dhe Kërçikun. Në pjesën e dytë humbëm freskinë dhe kjo u dallua te Greca, Hasani dhe Ngo. Në pjesën e dytë loja u bë më e vështirë. Gabime në pasime, ndërsa në pjesën e parë u treguam më të saktë në këtë aspekt.
Fitorën e donim me shpirt. por nuk ishte fati me ne. Ndoshta duhet të kishim shënuar gjatë pjesës së parë”, deklaroi mes të tjerash trajneri i Tiranës, Ardian Mema.
Ndërkohë tekniku i Partizanit, Skënder Gega, tha se priste më shumë nga të tijtë. Gjithsesi tekniku, e vlerëson pikën e marrë në derbi dhe beson se Partizani i tij, do të jetë më produktiv në takimet e ardhshme.
“E filluam jo mirë dhe Tirana na rrezikoi disa herë. Në fakt prisja më shumë nga skuadra. Derbi ka tensionin e vet. Sidomos kur vjen përballë një ekip që nuk ka presion. Tirana dha maksimumin në pjesën e parë, por në pjesën e dytë ne ishim më mirë dhe prisja më shumë.”
Idrizaj?
“Nuk di se si është situata. Në pamje të parë u duk gjëndje e rëndë me gjurin që e kishte shumë keq. Uroj të kthehet sa më parë për familjen për ne si skuader.
Në vijim do të shohim të rekuperojme forcat e te bejme gati takimin e radhës,”– tha Gega.
