Gega: Derbi? Japim100%…
Skënder Gega, sikurse homologu i tij i Tiranes Ardian Mema, doli sot para mediave për të bërë prezente gjëndjen e grupit të tij para duelit të nesërm me Tiranën pritëse. Sikundër dhe në të shkuarën, tekniku i kuq, u shfaq i qetë në deklarata. Fillimisht u duk se Gega, kërkon të mos e shohë derbin si një ndeshje të madhe duke thënë se takimi i nesërm, mbetet një sfidë e radhes. Më pas tekniku nga Tropoja, u ndal në detaje.
“Ndeshja e radhës, e zakonshme. Nuk ka asgjë ekstra. Është i njëjti regjim e njëjta punë. Kam dëshirë të fitoj derbin e më pas të fitojmë dhe titullin”.
Ndërkohë dhe pse Gega beson se të tijtë do bëjnë mirë, duket se në vijim i del thirrja për “alarm”. Tekniku kërkon maksimumin nga grupi duke e njësuar atë që kërkon në fushë të përkthyer në përqindje.
“Të japin 100%-in dhe të marrim pikët maksimale. Në derbi presioni është i madh. Klubet kanë histori, por ne duke mos pasur probleme fizike duhet të jemi të qartë për atë që kërkojmë të bëjmë.
“Tifozët janë adrenalinë e çdo skuadre”,- ecën në konferëncë trajneri, duke vijuar përgjigjen e radhës mbi rëndësinë e fansave në stadium.
Rivalët?
“I shoh ndeshjet e kundërshtarëve dhe nuk është se më vjen mirë kur gabon kundërshtari. Batutat në ndonjë rast janë vetëm batuta,”- deklaroi ndër të tjera Skënder Gega.