E rrallë/ Policia në grevë, anulohet Fejnord-Ajaks
Ngjet në Holandë. Anulohet supersfida Fejnord- Ajaks, shkak greva e policisë.
Komuna e Roterdamit ka ndaluar ndeshjen e kampionatit holandez mes rivalëve të ashpër Fejnord dhe Ajaks për shkak të një greve të planifikuar nga oficerët e policisë në stadium këtë fundjavë.
Kryetari i bashkisë së Roterdamit, Ahmed Aboutaleb njoftoi vendimin – siç raportoi transmetuesi holandez NOS të martën – duke shpjeguar se siguria për lojtarët dhe publikun “nuk mund të garantohet mjaftueshëm pa policinë”.
Policia holandeze po bën fushatë për të ruajtur të drejtën e saj për pensione të parakohshme. Tashmë nuk dihet se kur do të luhet ndeshja e planifikuar për të dielën. Federata Holandeze e Futbollit tha se ndoshta do të duhet të zhvendoset në një raund të mesjavës.
