Futsall/ Shqipëria triumfon me goleadë ndaj Zvicrës në miqësore
![](https://sportiim.al/wp-content/uploads/2023/09/futsall-1024x683.jpeg)
Është luajtur sot miqësorja e dytë mes Shqipërisë dhe Zvicrës në futsall, një ndeshje mjaft e bukur dhe me plot golat shënuar që u mbyll me rezultatin 7-1 në favor të kuqezinjve tanë.
Trajneri Erind Resuli e nisi ndeshjen me këtë formacion titullar: Valdrin Mjeku, Halim Selmanaj, Mentor Mejzini, Arif Limani, Darreer Soares De Melo.
Shqipëria e nis mirë sfidën dhe dominon lojën me raste për shënim, teksa në minutën e pestë arrin të kalojë në avantazh me Halim Selmanaj, i cili realizon pas një aksioni mjaft të bukur individual. Goli ka çliruar kuqezinjtë që ndalen më dhe në minutën e 10-të arrijnë të dyfishojnë shifrat me Arif Limanin, një nga prurjet e reja të këtyre miqësoreve.
Më pas i vjen radha Flamur Tahirit, të shkundë rrjetën me golin e tij të çojë shifrat në 3-0 në minutën e 13-të, teksa Shqipëria kalon një moment mjaft të mirë dhe konkretizon siç duhet rastet. Është sërish Arif Limani ai që shënon golin e tij të dytë personal dhe të katërtin për Shqipërinë në minutën e 16-të, ndërsa një minutë më pas është Darrieer Soares De Melo, i cili realizon një gol të bukur për të fiksuar shifrat në 5-0. Zviceranët shënojnë ndërkohë një gol nderi, ndërsa pjesa e parë mbyllet me rezultatin 5-1.
Në pjesën e dytë Shqipëria vazhdon të jetë dominuese dhe arrin të shënojë edhe dy gola të tjerë me anë të Artan Jonuzit në minutën e 25-të dhe më pas vulos shifrat përfundimtare të sfidës në 7-1 goli i Endrit Kacës.
Një paraqitje mjaft e mirë e Shqipërisë, që arrin të triumfojë në të dyja miqësoret me Zvicrën, teksa në sfidën e parë triumfoi me përmbysje 3-2. Trajneri Resuli pati mundësi të provonte shumë lojtarë të rinj, të cilët mund të jenë të vlefshëm për ndeshjet dhe turnetë zyrtarë në muajt në vazhdim./FSHF/