Shkëmbi: Guxojmë për të fituar
![](https://sportiim.al/wp-content/uploads/2021/07/shkmbi.png)
Java e katërt e Abissnet Superiore, starton të premten në 19:45 me sidën Dinamo- Partizani në program në ‘Elbasan Arena’.
Ishte trajneri i Dinamos Bledi Shkëmbi i cili në daljen sot para mediave bashkë me Siljavovskin tha se ndaj Partizanit, skuadra e tij do të ketë një marsh më tepër se në tri takimet e luajtura dei tani.
Shkëmbi:
Derbi – “Jemi munduar që ekipi të qetësohet, të mos kemi presion, sikurse jemi munduar t’ua shprehim të huajve rëndësinë e derbit. Të tjerët e ndjejnë, pasi e njohin derbin. Është një ndeshje e veçantë deri në këto momente. Do ishte më mirë të luhej në Tiranë, por edhe Elbasani ka fushë ku mund të shprehesh mirë në aspektin teknik.”
Tifozët – “Keqardhje mund të ketë vetëm për tifozerinë. Jemi të kënaqur që po na ndjekin. Ata do kthehen sërish, prej rezultateve tona në vazhdim”.
Dinamo – “Dinamo është ribërë dhe kemi guxuar, duke luajtur për të fituar. Analizat bëhen pas ndeshjeve, ne e dimë çfarë ndodh. Nuk e bëjnë dot të tjerët më mirë analizën. Kemi marrë dy barazime, por mund të merrnim diçka më shumë. Jemi të kënaqur. Do mundohemi të fitojmë, pa harruar se luajmë ndaj një ekipi të fortë si Partizani. Janë dy ekipe të denja për ta fituar ndeshjen. Për Dinamon do jetë çdo ndeshje barometër, deri kur të vijë ajo që duam. Jemi në rrugë të mbarë dhe jam i bindur që e ardhmja e Dinamos do të jetë e mirë.”
Partizani – “Partizani është rival i fortë, luajnë me ritëm në të dyja fazat.”
Kampionati – “Nuk ka një ekip që bën diferencën. Do jetë kampionati i vetëm që javë pas jave nuk do mundësh të marrësh frymë lehtësisht, pasi do jetë e vështirë çdo ndeshje.”
Formacioni – “Do shikojmë stërvitjen për të vendosur për formacionin. Kemi dy lojtarë me probleme fizike dhe më pas do të vendosim si do të rreshtohemi”.