Krymi dëbohet për dy ndeshje, Disiplina në vendime

Ardit Krymi së bashku me Enea Bitrin u përshinë në një kontakt fizik gjatë Partizani-Vllaznia dhe më pas Hamiti gjyqtar, i nxori jashtë me të kuqe. Por ai që dënohet nga Komisioni i Dispilinës sot është vetëm mesfushori shkodran.

Disi e çuditëshme kur pamjet tregojnë se inisiatori i zënkës është beratasi. Paralajmërohet edhe Tirana se duhet që të ruajë terrenin në “Selman Stërmasi”, në rast të kundërt do të gjobitet.

Vendimet:

1. Lojtari i KF Vllaznia, Ardit Krymi, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.

2. KF Tirana, në bazë të nenit 12 të KDS, paralajmërohet se në rast të përsëritjes së stërvitjes në stadiumin “Selman Stërmasi”, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.

3. KS Kastrioti U-21, për braktisjen e ndeshjes së vlefshme për Kampionatin Kombëtar të Kategorisë Superiore U-21, kundër KF Bylis U-21, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.

4. Lojtari i KF Shkodra U-19, Albi Shpuza, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.

5. Lojtari i Shkëndija Dr. U-19, Eldi Mala, për lojë të rëndë ndaj kundërshtarit, në bazë të nenit 47/1/b të KDS, dënohet me 2 (dy) ndeshje pezullim nga aktiviteti.