Duro: Respektojmë Kastriotin, objektivi tri pikët…
Kastrioti-Laçi nesër në 13:45 në stadiumin ‘Kamza’.
Ka provën e 4-ët serioze në krye të Laçit. Shpëtim Duro, në pak kohë, ka ditur të vendosë në shina mekanizmat e një grupi futbollistësh në ngërç duke arritur të barazojë fillimisht me Teutën(1-1) në transfertë e më pas të fitojë dy takime në shtëpi me Vllazninë (1-0) e vendit të parë dhe Bylisin (2-0) të konvertuara në 7 pikë.
Ndërkaq, nesër bardhezinjtë në duelin me Kastriotin në Kamëz, duket se do të synojnë fitorën. Do kenë sërish mungesën e Kirian Nuabueze por me gjasë kanë rekuperuar mesfushorin Lukas Ramos. E pranon tekniku kryeqytetas i cili për ‘Sporti im.al’ tha:
Me Kastriotin në Kamëz…
“Me Kastriotin ndeshje fortë. Duhet të respektojmë kundërshtarin sepse përgjatë gjithë këtyre javëve kanë ditur të tregohen një skuadër e aftë për të marrë pikë skuadrave pretendente.
Duke respektuar rivalin, nuk do të thotë që ne kemi ndonjë synim tjetër. Objektivi ynë mbetet fitorja.
Situata te skuadra…
“Mungon sërish Nuabueze i dëmtuar në gju, ndërsa drejt kthimit në formë optimale është mesfushori Lukas Ramos. Pjesa tjetër në dispozicion”
Formacioni i mundëshëm?
“Kemi dhe një seancë pasdite dhe formacionin do e vendos pas kësaj përgaditjeje të fundit para ndeshjes me krutanët”.
