Kallaku: Keqardhje, meritonim më shumë
Sherif Kallaku nga kapiten i U21, katapultohet te Kombëtarja A. E nisi futbollin me moshat e Partizanit, te Laçi u afirmua, Teuta e ‘poqi’ dhe tani në kampionatin kroat me Lokomotiva Zagreb.
Fati e deshi që futbollisti i Lokomotiva Zagreb të vishte fanellën e rëndë të Kombëtares në Kazakistanin e largët duke treguar shpesh se klasi në përdorim të topit dhe fantazia janë armët më të forta të 22 vjeçarit nga Fushë-Kruja.
Në mikrofonët e RTSH-së për emisionin “Kuqezi”, Kallaku tha:
“Ndjej keqardhje, sepse kemi zhvilluar një ndeshje shumë të mirë. Duhet të shfrytëzonim rastet dhe të ishim më të qetë. Fati nuk ishte me ne. Parabola e Brojës duhet të ishte shënuar. Duhet të shikojmë ndeshjen e ardhshme, kjo ndeshje iku tani.”
Ambientimi: Mendoj që, duke parë vështirësitë që kishim me ambientimin e skemës së re, trajneri vendosi ta kthente në 3-5-2. Vendosi që unë dhe Bare të ishim në qendër majtas dhe djathtas. Nuk kisha lirshmërinë time siç duhej. U mundova të përshtatesha dhe të luaja thjesht për të qenë sa më i saktë. Mendoj që jemi përshtatur shumë mirë, duhet të rregullojmë aksionet para portës, kjo na mungoi.”
Goditja e portës: “Në ndeshjet e ardhshme do të kem gjuajtje më të mira. Ishte çështje sekonde dhe vendosa ta gjuaja shpejt, duhet të finalizoja më mirë”.