Komisioni i Ligave e Garave përcakton kalendarin e “Abissnet Superiore” për 5 javët e ardhshme

Komisioni i Ligave dhe Garave është mbledhur dhe ka përcaktuar kalendarin e ndeshjeve të kampionatit “Abissnet Superiore”, nga java e 9-të e deri në javën e 13-të. Ky kampionat do të rikthehet menjëherë pas pauzës nga ndeshjet e ekipeve kombëtare në kompeticionin Nations League.

Sfidat e javës së 9-të të kampionatit “Abissnet Superiore” do të luhen të ndara në dy ditë, konkretisht në datat 19 dhe 20 tetor, teksa spikat takimi Tirana – Dinamo City. Java e 10-të e kampionatit elitë do të luhet në fundjavën e 25-26 tetorit. Ndeshja më interesante e kësaj jave pritet të jetë Vllaznia – Partizani.

Java e 11-të e kampionatit do të luhet në mesjavën e 30-31 tetorit, ku spikat klasikja e futbollit shqiptar, Tirana – Vllaznia. Java e 12-të do të luhet me 3 dhe 4 nëntor, ndërsa java e 13-të e këtij kampionati do të zhvillohet në fundjavën e 9 dhe 10 nëntorit. Në këtë javë të 13-të do të luhet përballja, Dinamo City– Partizani.