Silvinjo mbivlerëson Çekinë dhe ideon formacionin

Sot në “epet ARENA” (20:45), Shqipëria përballë Çekisë vendase në duelin e tretë të Ligës B1. Braziliani i kuqezinjëve i beson ideve të tij.

E nisi plot pesimizëm konferencën për shtyp. Trajneri i Shqipërisë Silvinjo startoi në konferencë për shtyp duke mbivlerësuar në maksimum ekipin çek duke e konsideruar rivalin e sotëm ndër të tjera kështu:

“Çekia është skuadër shumë fizike, bën tranzicione të shpejta, do të jetë e vështirë. Çekia ka shumë lojtarë të mirë, ka mesfushorë të mirë që mund të shënojnë edhe gola”.

Në fakt ai tha se asnjë trajner nuk e përgatiti një ndeshje për barazim apo humbje ndërsa duke folur për strategjënë kuqezi shtoi:

“Është një ekip i vështirë, i ashpër dhe luan në nivele shumë të larta. Kanë luajtur në kampionate Europiane dhe Botërore. Ne si skuadër jemi rritur dhe përmirësuar, por duhet të përmirësohemi akoma më tepër. Kemi bërë një rrugëtim shumë të bukur, kemi lojtarë të mirë që po luajnë në nivele të larta”.

Lënë pas të gjitha këto, sot braziliani teksa qahet për mungesat në sulm pritet të hedhë në fushë një grup luftarak. Ai vijon t’i besojë Hysajt në të djathtë edhe pse shkodrani është “fshirë” nga Lacio (shpreson të riktheshet në listë pas dëmtimit të Lazarit) duke vijuar të mbajë në stol një mbrojtës të kompletuar si Ivan Balliu.

Në formacionin eventual (ndonëse ai zyrtar mund të ketë ndryshime), bie në sy edhe spostimi i Nedim Bajramit në të majtë për t’i lënë mesfushën Asllanit me probleme shëndetësore gjatë ditëve të fundit.

Edhe në prapavijë krahas Ismajlit që ka hyrë në radarët e Juves shihet Kumbulla si zgjedhje para Ajetit. Për portën e di…Silvinjo.

Ky është formacioni eventual i Shqipërisë (grafikisht).