Pas 36 javëve radha e ‘Final Four’, formula, shorti, datat
Pas mbylljes së kampionatit me 4 faza teksa Egnatia, Vllaznia, Dinamo dhe Partizani janë zyrtarisht pjesë e betejes sportive për titull, tani radha është e zbatimit të formulës me dy gjysmëfinale, e më pas finalja e vogël për vendin e tretë dhe finalja e madhe për titull kampion.
Në fakt, Departamenti i Garave në FSHF ka përcaktuar datat e zhvillimit të ndeshjeve të fazës “Final 4” në stadiumin “Arena Kombëtare”, në periudhën 4–12 maj 2025. Gjysmëfinalja e parë do të luhet më 4 maj, ndërsa gjysmëfinalja e dytë më 5 maj.
Finalja për vendin e tretë/katërt është planifikuar për datën 9 maj, ndërsa finalja për titullin kampion do të luhet më 12 maj. Pas përfundimit të kampionatit të rregullt, u përcaktuan edhe vazot e ekipeve për ‘Final Four’, teksa dy vendet e para pas 36 javëve Egnatia dhe Vllaznia janë pjesë e vazos së parë, ndërsa Dinamo dhe Partizani te vazo e dytë.
Shorti për përcaktimin e çifteve gjysmëfinaliste do të hidhet më 29 prill, në ora 11:00 në ambientet e “Shtëpisë së Futbollit”.
Ndërkaq fituesi i titullit kampion 2024/25 siguron pjesëmarrjen në turin e parë kualifikues tëChampions League ndërsa tre ekipet e tjera do të marrin pjesë në raundin e parë kualifikues të Conference League.
