Betejë sportive, Laçi e Elbasani ndajnë pikët
Abissnet Superiore, Java 13:
Laçi – Elbasani 1-1 (Mjaki 3’/ Tasgue 59’)
Për llogari të javës së 13-të Abissnet Superiore u luajt sfida mes Laçit dhe Elbasanit. Ekipet e drejtuara nga dy italianë në pankinat përkatëse u ndanë në barazim 1-1 në një duel mjaft të luftuar.
Kurbinasit morën shumë shpejt avantazhin me anë të Mjakit teksa po luhej minuta e tretë, por më pas miqtë morën frenat e lojës në dorë duke diktuar në fushë.
Një penallti e akorduar në favor të verdhebluve nuk u shfrytëzua si duhet nga Tsague me Dajsinanin protagonist në pritjen e këtij 11-metërshi.
Pjesa e dyte regjistroi dhe një gol tjetër në të 59’-tën me miqtë që barazuan gjithçka falë atij që humbi penalltinë. Tsague shënoi pas një topi të përplasur në këmbën e tij duke mos i lënë asgjë për të bërë Dajsinanit.
Sakaq, ekipet shpërdoruan shumë raste të krijuara duke bërë që sfida të mbyllej në barazim dhe skuadrat të ndanin pikët./Sara Gjidiaj/
