UEFA ndëshkon sërish Shqipërinë
![](https://sportiim.al/wp-content/uploads/2024/06/shqipëri-spanje-2-ore-para-startit-24-1024x576.jpg)
Sërish masa ndëshkuese për Kombëtaren kuqezi. UEFA ka bërë të ditur se ka marrë një vendim ndaj Shqipërisë për shkak të ngjarjeve në ndeshjet Kroaci-Shqipëri dhe Shqipëri-Spanjë në Euro 2024. Institucioni europian i futbollit në fazën e hetimit ka marrë si objekt shqyrtimi e analize sjelljen “raciste dhe diskriminuese” të tifozëve shqiptarë.
“Komisioni i Etikës dhe Disiplinës vendosi të gjobitë FSHF 30 mijë euro dhe të ndalojë Federatën nga shitja e biletave për ndeshjen e saj të radhës në kompeticionet e UEFA-s si udhëtuese, për sjellje raciste dhe diskriminuese të mbështetësve të saj. Dënimi në fjalë për shitjen e biletave do të jetë i pezulluar në një periudhë prove prej dy vitesh”, shkruan në njoftim UEFA.
Në këto kushte FSHF duhet të paguajë gjobën, ndërsa dënimi i pezullimit të shitjes së biletave ndaj tifozëve shqiptare në një ndeshje jashtë fushe, do të hyjë në fuqi vetëm nëse në dy vitet e ardhshme do të evidentohen incidente analoge.