Tirana për kreun, Vllaznia për ‘hakmarrje’
Vllaznia- Egnatia në 16:30 dhe Tirana- Kastrioti në 19:00 në ‘Air Albania Stadium’ janë dy duelet e sotme të Abissnet Superiore të javës së 13-të.
Te Vllaznia, Mirel Josa ka vijuar përgatitjet menjëherë që pas sfidës finale të Superkupës për ndeshjen e kampionatit ndaj Egnatias.
Për shkak të reshjeve të shiut skuadra ka qenë e detyruar të stërvitet për disa seanca në fushën “Reshit Rusi”. Shkodranët janë thyer thellë në Rrogozhinë gjatë fazës së parë 3-0.
Në Rrogozhinë janë të bindur se skuadra e tyre është e aftë të ndalë Vllazninë ndërsa në këtë transfertë dilemat e Duros për formacionin, janë të pakta. Të dyja skuadrat kanë kontigjentin thuajse të plotë.
Tirana marrë shkas dhe nga ndalesa e Partizanit dje me Erzenin 3-3 kërkon të shkëputet në krye. Stafi teknik bardheblu ka kërkuar përqëndrim maksimal ndaj Kastriotit, ndërsa këta të fundit duket se me arsenalin e tyre të plotë do përpiqen të ndalin kampionët.
Ndërkaq po zhvillohen dy ndeshje të Kategorisë së Parë të javës së 11-të.
Tomori- Flamurtari dhe Besëlidhja- Apolonia janë duelet e ditës së sotme.