Erzeni ‘rrëmben’ Tiranën, shijakasit të dytët pas fazës së parë
Abissnet Superiore, Java 9:
Tirana – Erzeni 0-1 (Kahrimanoviç 15′ (p))
Përfundon faza e parë e elitës së futbollit shqiptar. 3 sfidat e fundit u fituan me të njëjtin rezultat (0-1) nga skuadrat udhëtuese.
Erzeni, ekipi që e nisi me një surprizë përballë Vllaznisë, e mbyll në të njëjtën mënyrë duke befasuar këtë radhë Tiranën.
Shijakasit e nisën më mirë sfidën në “Elbasan Arena”. Vrulli i sulmeve nga miqtë u konkretizua me një penallti të shkaktuar nga Përgjoni pas prekjes së topit me dorë. Kahrimanoviç u tregua i saktë në ekzekutimin e 11-metërshit duke kaluar Erzenin në avantazh.
Pavarësisht reagimeve të shumta të bardhebluve rezultati nuk ndryshoi në minutat e mbetura të sfidës. Gjatë pjesës së dytë ishte Redon Xhixha që gjeti rrjetën por në pozicion jashtë loje çka solli dhe anulimin e këtij goli për Tiranën.
Pas kësaj humbjeje Tirana do ta ndajë vendin e dytë në renditje me skuadrën e Erzenit, teksa Partizani kryeson i vetëm me 4 pikë më shumë se ndjekësit./Sara Gjidiaj/