Kaosi/ Kupa e Amerikës në Brazil luhet në “Gjykatën Supreme”

Vijon kaosi për Kupën e Amerikës në Brazil, Gjykata Supreme vendos të enjtën.

Gjykata e Lartë e Brazilit do të shqyrtojë dy apelime urgjente duke kërkuar pezullimin e organizimit të Kupës së Amerikës në vend të enjten e ardhshme.

Sipas burimeve gjyqësore, presidenti i Gjykatës së Lartë, Luiz Fux, ka vendosur që 11 gjyqtarët duhet të vendosin urgjentisht për shkak të natyrës “të jashtëzakonshme” të apelimit, duke pasur parasysh që turneu duhet të fillojë të dielën e ardhshme, me Brazil- Venezuela.

Më 31 maj, Konfederata e Futbollit e Amerikës së Jugut (CONMEBOL) kishte vendosur që turneu të luhej në Brazil, pasi Argjentina dhe Kolumbia kishin hequr dorë për shkak të problemeve organizative në lidhje me pandeminë Covid-19.

Zgjedhja, e cila kishte pasur mbështetjen e plotë të presidentit, Jair Bolsonaro, kishte ngritur shumë kritika dhe vazhdon të jetë një arsye për konflikt politik në vend. Partia Socialiste Braziliane dhe Partia e Punëtorëve paraqitën një apel në Gjykatën e Lartë kundër mbajtjes së Kupës së Amerikës në Brazil, ku Covid vrau 475,000 njerëz.

Gjykata Supreme do vendosë një mënyrë “virtuale”, pa debat midis gjyqtarëve, të cilët do të dërgojnë votat e tyre deri në mesnatën e së enjtes.