Lamtumirë kampionit të Boksit
Ndahet nga jeta në moshën 85-vjeçare, boksieri dhe komentatori i njohur i boksit, Ahmet Golemi.
Lajmin e ndërrimit nga jeta të Golemit e ka dhënë i biri i tij nëpërmjet rrjeteve sociale.
Ahmet Golemi është shpallur 5 herë kampion në Shqipëri, gjithashtu ai do të mbahet mend edhe si komentatori më i mirë i boksit në vend.
Në një intervistë të një viti më parë për sportin e boksit, Golemi do të shprehej:
“Boksi shqiptar u burgos në 1964-ën, kur në janar në “Sporti” nuk u shpall kalendari i aktiviteteve kombëtare të tij për vitin. Heshturazi doli që është hequr, por nuk foli askush.”
Nuk është e vështirë të kuptohet se sa e donte boksin një kampion boksi.
Ahmet Golemi mbante titullin “Mjeshtër i Madh”.
Në vitin e largët 1979, Golemi përjetoi edhe një periudhë të errët pasi nga regjimi i kohës u dënua me pesë vite heqje lirie për agjitacion dhe propagandë duke qenë se kishte festuar fitoren e kampionit me përmasa botërore Mohamed Ali.