FSHF apel Policisë: Arresto agresorët!…
● Në ndeshjen Shkumbini-Dinamo në Kategorinë e Parë, sot është dhunuar gjyqtari Sokol Bebja. FSHF dënon aktin dhe i kërkon Policisë arrestimin e agresorëve dhe nxjerrjen e tyre para ligjit.
Federata Shqiptare e Futbollit dënon me ashpërsi aktin vandal të dhunimit të arbitrit Sokol Bebja në ndeshjen Shkumbini-Dinamo në qytetin e Peqinit.
FSHF i bën thirrje Policisë së Shtetit të marrë urgjentisht masat për të arrestuar agresorët në fjalë dhe kërkon nxjerrjen e tyre të menjëhershme para ligjit, bazuar në nenin 274/A të Kodit Penal. FSHF garanton se do ta ndjekë deri në fund këtë çështje në të gjitha instancat e drejtësisë.
FSHF nuk do të lejojë në asnjë çast nëpërkëmbjen e autoriteteve sportive dhe ndërhyrjet e huliganëve në dëm të cilitdo në ambjentet sportive, përfundon njoftimi i shpërndarë nga zyra e shtypit në FSHF.