Marvin Turtulli, lojtari më i ri i Skënderbeut…
● Mësohet, se të shtunën, në mjediset e “Tropikal Resort”, Skënderbeu do të zhvillojë një miqësore me skuadrën ballshiote të Bylisit.
Ish-“diga” e mbrojtjes bardheblu, shtatlarti Marvin Turtulli, është lojtari më i ri i të Skënderbeut. Ai ka nënshkruar një kontratë me presidentin Ardian Takaj dhe sezonin e ardhshëm do të jetë një prej lojtarëve që do të mbrojnë portën korçare.
Në korrik të 2016-të, Turtulli, një futbollist i formuar te Dinamo, veshi fanellën bardheblu të Tiranës, me të cilën ka zhvilluar 53 ndeshje dhe shënuar edhe 3 gola. Pas përfundimit të kontratës 3-vjeçare me kryeqytetasit, 24-vjeçari shtatlartë gjen “strehëz” te Skënderbeu i Korçës.
Për koincidencë, aty ai takohet sërish me trajnerin Ilir Daja, i cili asokohe e afroi te Tirana. Marvin Turtulli, tani pasdite pritet të zbresë në fushë me skuadrën tij të re, Skënderbeun.