E prisnin në Gjermani, Selmani zgjedh Turqinë
Gentian Selmani portieri i Laçit, duket se ka lënë perfundimisht formacionin bardhezi.
Sipas asaj që publikon klubi turk i Menemensporit në Istagram, 21-vjeçari nga Miloti dhe me banim në Fushë-Krujë, është bërë pjesë e “hartës” turke të Izmirit, skuadër që militon në Ligën e parë në Turqi.
Selmani me kurbinasit përfundoi kontratën pas aktivizimit në kualifikueset e Europa League, teksa në mënyrë të beftë ka firmosur një kontratë me kohëzgjatje për dy sezone me skuadrën nga provinca e Izmirit.
Për aftësitë e Gentian Selmanit flitet prej kohësh, pasi djaloshi i stërvitur në “erë e në shi” nga Perlat Musta për 12 vite me radhë (5 deri në 17 vjeç), ka fituar reflekse, eksperiencë dhe falë aftësive, ka mbërritur deri në Kombëtaren kuqezi.
Në fakt, habia e madhe e këtij trasferimi lidhet me përzgjedhjen e bërë nga Selmani dhe menaxherët e tij. Arsyeja është e thjeshtë dhe ka të bëjë me ofertat e shumta që ka pasur dy edicione radhazi ish-portieri bardhezi.
Dy ekipe në Shqipëri dhe dy të tjerë të Bundesligës 2 në Gjermani, por dhe një ekip nga rajoni i Puljes në Itali, patën kërkuar sherbimet e Selmanit asokohe 19 apo 20 vjeç.