Shaland: Këta nuk dorëzohen kurrë, kurrë!…
Trajneri zviceran i Kosovës, Bernard Shaland, nuk ka mundur ta fshehë entuziazmin pas fitores me Bullgarinë. Pas ndeshjes, në stadiumin “Vasiljevski” të Sofjes, ai do të deklaronte për mikrofonin e Supersport Kosovës:
“Jam shumë i lumtur, sidomos për lojtarët. Nuk dorëzohen kurrë, kurrë! Vetëm punuan sot. U përpoqëm e u përpoqëm në çdo mënyrë për të fituar dhe ia dolëm. Treguan një shpirt luftarak të vërtetë”.
“Mentaliteti i skuadrës është i rëndësishëm, skuadra duhet të tregojë karakter edhe në momentet negative, ata u përgjigjën mirë kur ishim në disavantazh dhe kjo ka rëndësi për mua. E pamë se luajtëm futboll të mirë, provuam me çdo mënyrë. Kemi një skuadër mesatare shumë të re, vetëm 23 vjeç”.
Europiani? “Çdo gjë e madhe ka filluar me një ëndërr. Le të ëndërrojmë kjo është filozofia ime. Në momentin kur na shënuan golin e dytë, do isha i kënaqur dhe me një barazim, por me aq mundësi sa krijuam në fund të lojës, do të mërzitesha sikur të mos fitonim”.