Mema: Na duhen pikët, nuk pres dhurata…

Trajneri i bardhebluve, Ardian Mema, në konferencën për shtyp në prag të derbit, ka folur për situatën e Tiranës, e cila është përgatitur për të marrë makimumin e pikëve të mundshme. Si pas Memës, fitorja do të ishte një dhuratë e bukur në këtë fund të sezonit për tifozët, por për këtë skuadra e tij duhet të jetë tepër e kujdesshme. Kjo pasi përballë ka Partizanin, një skuadër, e cila edhe pse do të ketë mungesa, sërish mbetet një kundërshtar shumë i forte. Në vijim, tekniku i bardhebluve, nuk e ka pranuar aludimin e ndonjë dhurate nga “të kuqtë”, që thuajse e kanë siguruar titullin kampion. Mema ka thënë, se derbi është një ndeshje e veçante, dhe se Tiranës nuk i ka falur askush asgjë.

NDESHJA ME PARTIZANIN – “E kemi përgatitur ndeshjen dhe do luajmë për tri pikë. Na nevojiten pikët dhe kjo është më e rëndësishmja për ne. Gjithsesi, gjithçka do të tregojë fusha dhe loja e nesërme. Do bëjmë maksimumin për të marrë pikët dhe të shohim përpara.”

PRESIONI I DERBIT – “Si anë psikologjike është e mirë, pasi vijmë nga dy fitore radhazi. Presioni në derbi është gjithmonë. Sido që të ishte renditja do të kishte presion. Është ndeshje historike dhe janë dy ekipe të mëdha.”

FESTA E PARTIZANIT – “Ne lumturohemi nga rezultati jonë. Nuk më shqetëson pjesa e kundërshtarit. I bëj yzmet punës dhe ekipit tim. Nuk luajmë për të prishur festën e Partizanit, por për veten tonë. Kemi problemet tona dhe janë evidente.”

FITORJA NË DERBI – “Tirana ka kohë që nuk fiton ndaj Partizanit dhe do të ishte një dhuratë për këtë fund sezoni për tifozët.”

EKIPI – “Kam qenë duke bërë analizën me skuadrën. Problemet kanë qenë evidente, siç i kam parë në fushë. Duhet të bëjmë riparimet e duhura, pa parë kundërshtarin. Nëse skuadra jonë do luante me përqendrim, nuk do flisnim fare për mbijetesën tani. Duhet një analizë edhe për vetë lojtarët, që të përmirësohen dhe të bëjnë përpara, ashtu si duhet të bëj unë analizë për veten dhe klubin.”

HOXHA S’DO RËNIEN E TIRANËS – “Po të ishim në role të kundërta, edhe unë ashtu do thosha. Tirana e Partizani, përtej rivalitetit në derbi, kanë bërë historinë e njëra-tjetrës. Historia shkruhet nëpërmjet fakteve dhe dueleve ndër vite, Partizani-Tirana ka qenë ndër më të mëdhenjtë.”

MERKATOJA E TIRANËS – “Në fund të sezonit do të bëhet një analizë e thellë, për të kuptuar gabimet që kemi bërë dhe për të mos i bërë në të ardhmen.”

MUNGESAT E PARTIZANIT – “Ka goxha elemente të mirë, përtej mungesave, që janë shumë të rëndësishme. Mensah e doja në janar, por nuk u arrit marrëveshja. Po ashtu, Asani është lojtar që më pëlqen shumë, ashtu si Telushi. Është favor për Tiranën që Partizani ka këto mungesa dhe duhet ta shfrytëzojmë këtë moment.”

ASNJË FITORE PREJ VITESH – “Nuk e di këtë, është subjektive. Këtë vit kemi humbur një derbi që nuk duhej ta humbnim, kemi barazuar në një ndeshje që mund ta fitonim. Fjala favorit në derbi nuk ka shumë vlerë, mendoj se përqendrimi maksimal jep rezultat në derbi. Nuk ka favoritë, është presion artificial kur flitet për favoritë ose jo. Karikimi është i detyruar, por favoritin e vendos fusha. Jemi duke luajtur mirë prej disa ndeshjesh, duke përfshirë ndeshjet ndaj Luftëtarit, që e ka mundur bindshëm Partizanin. Kemi gabuar në disa momente në mbrojtje, si shpesh këtë sezon, por nesër ekipi do jetë i karikuar mirë, vetëvetiu, pa qenë nevoja të flas unë.

PARTIZANI THUAJSE KAMPION, FAVOR PËR TIRANËN? – “Nuk e mendoj kështu, Partizani ka kalendar shumë të vështirë dhe nuk pres asnjë dhuratë. Tiranës nuk i ka falur askush asgjë, nuk pres të ndryshojë gjë. Kemi Partizanin dhe Kastriotin përpara, këto janë finalet tona. Nëse dalim mirë në këto dy ndeshje, gjithçka merr për mbarë dhe do të mendojmë më pas për finalen e kupës, që është mundësia e madhe për të shkuar në kupat e Europës”.