Sulmuesi Sural, humb jetën në aksident…
● Aksidenti tragjik në Turqi: gjashtë lojtarë u plagosën, ndërkohë që humb jetën sulmuesi 28-vjeçar i Alaniasporit
Futboll me zi. Mbrëmë natën, sulmuesi i skuadrës turke të Alaniasporit, çeku Jozef Sural, vdiq pas një aksidenti me makinë. Mikrobuzi, ku udhëtonte i ndjeri, bashkë me 6 futbollistë të tjerë, u përmbys 5 km larg nga qyteti i Alanias, pas kthimit nga fusha e Kayserispor ku barazuan.
Në kushte kritike, Sural u operua menjëherë, por ndërhyrja kirurgjikale nuk ishte e mjaftueshme për të shpëtuar jetën e tij. Gjashtë lojtarë të tjerë u plagosën lehtë në aksident dhe janë jashtë rrezikut për jetën.
Aktualisht, dinamika e aksidentit ende nuk është e qartë dhe autoritetet kompetente po hetojnë për këtë. Sipas presidentit të klubit turk Hasan Çavushoglu, aksidenti mund të jetë shkaktuar nga përgjumja e shoferit, i cili ka humbur kontrollin e automjetit.
Sulmuesi Jozef Sural (28 vjeç) është bashkuar me skuadrën turke të Alaniasporit gjatë merkatos së janarit. I ardhur nga Sparta e Pragës, kjo ishte përvoja e parë jashtë vendit për Sural, që kishte luajtur edhe 18 ndeshje me fanelën e kombëtares së Çekisë, duke shënuar edhe një gol.
