“Nuk mjafton loja e mirë, duhen golat”
Pas një 3-pikëshi të fituar në tavolinë të mërkurën, bardheblutë e Tiranës, të dielën, në orën 18:45 do të përballet me Teutën në stadiumin “Niko Dovana” të Durrësit. Një takim mjaft i rendësishëm për të dyja skuadrat.
Teuta, pas tri humbjesh, që të treja në transfertë, me Kukësin, Laçin dhe Flamurtarin, rikthehet në shtëpi me synimin për të rifituar pozitat e humbura në renditje. Europa tani është në vënë dyshim për të.
Bardheblutë e kryeqytetit, pavarësisht lojërave, u mungojnë pikët e nevojshme për të qenë të qetë në vazhdimin e kampionatit. Kastrioti i Krujës është vetëm 3 pikë larg tyre, duke i kërcënuar për mbijetesë në Superiore.
Trajneri i Tiranës, Ardian Mema, ka folur në prag të ndeshjes ndaj Teutës. Në konferencën e shtypit, ai ka prekur mjaft probleme, si për situatën dhe gjendjen që po kalon skuadra bardheblu, por edhe për takimin e së dielës me Teutën.
NDESHJA ME TEUTËN – “Çdo trepikësh ka vlerën e vet, sidomos në këtë situatë ku është skuadra. Një nga gjërat që kam biseduar me lojtarët është pjesa që duhet të fitojmë ndeshjen, pasi kjo gjë do të na çojë lart. Duhet dhe shumë kujdes, pasi janë momente jo të mira për ekipin tonë. Pavarësisht se pikët janë të nevojshme duhet të kemi kujdes, mjafton të shohim ndeshjet e fundit. Këtij ekipi nuk i kanë munguar rastet apo shanset për të fituar ndeshjet dhe këtu është përqendruar më së shumti diskutimi dhe analiza me lojtarët.”
PRESIONI – “Në këtë kampionat me dy ndeshje ndyshojnë shumë gjëra. Nuk dua ta vendos ekipin për asnjë çast në presion. Ky është dhe parim i imi. Vendos më mirë veten në presion se sa ekipin. Nuk duhet të humbasin, pasi mund të jetë mundësi edhe për vazhdimësi. Teuta është një ekip cilësor kështu që edhe barazimi është pozitiv, flasim për momentin që po kalojmë. Gjithsesi, ne do mundohemi për fitoren, pasi do të na bënte mirë. Sidoqoftë, është ndeshje futbolli dhe i ka të tre rezultatet.”
LOJA E TIRANËS – “Nëse përjashtojmë ndeshjen ndaj Laçit në Kupë, që më kujtoi ndeshjet e para te Tirana, ndeshjet e tjera kanë qenë të mira. Dhe ndeshja në Vlorë nuk ka qenë keq, vetëm na mungoi goli. Gjithsesi, nuk mjafton pjesa e të luajturit mirë, pasi rezultati është garanci për ekipin dhe për anën psikologjike. Këtu edhe jam ndalur më së shumti kur kam folur me lojtarët, pasi nuk është koha që të humbasim raste dhe të mos marrim rezultate.”
KUNDËRSHTARËT – “Edhe kundërshtarët tanë kanë ndeshje të forta, ashtu si ne. Duhet të shohim veten tonë dhe jo kundërshtarin. E keqja ka qenë gjithmonë te pjesa jonë, megjithëse, mendoj që rivalët e kanë pasur më të lehtë t’i fitojnë ndeshjet edhe me kundërshtarë të fortë, ky është mendim i imi. Të shohësh një ekip të fitojë me gola binjak është pak çudi. Emrin e ekipit nuk dua ta them. Sidoqoftë, fajin duhet ta kërkojmë te vetja jonë.”
PRESIONI QË KA TIRANA – “Ekipi duhet të jetë komod dhe t’i shohë gjërat si duhet. Janë 8 ndeshje dhe pikët aty janë. Nëse do luajmë mirë dhe do fitojmë, aty i kemi pikët. Nuk na sjell njeri problem. Duhet të sillemi mirë në fushë dhe duhet të dimë se çfarë duhet të bëjmë. Duhet të jesh i drejtpërdrejtë me ekipin dhe duhet t’i kërkosh maksimumin në këto ndeshje që kanë mbetur, sepse nuk kemi çfarë presim më shumë. Kjo javë ka qenë më ndryshe dhe stërvitja ka qenë e fortë. Kjo gjë më jep shpresa.”
ÇËSHTJA E 11-METËRSHAVE – “Penallti presim përsëri, pasi shans për të shënuar gol është. Jemi ulur dhe me stafin. Ne e kishim përcaktuar penalltinë. Është dhe çështje fati dhe gjendje psikologjike. Kur kam humbur penalltinë e dytë në karrierën time, nuk gjuajta më kurrë. Imami mori iniciativën. Për penalltinë e marr unë përgjegjësinë dhe jo lojtari. Shpresoj të kemi përsëri penallti.”
E ARDHMJA – “Nuk dua ta çoj nëpër mend për momentin. Shpresa ime është të shpëtojmë sezonin dhe të shohim edhe nga Kupa gjithashtu. Për Tiranën do bëja sakrifica edhe më të mëdha, pasi e kam edhe jetën të lidhur këtu. Nuk do e diskutoj kurrë pjesën e vazhdimësisë te Tirana.”
NJË BARAZIM NË DURRËS – “Synoj gjithmonë të fitoj ndeshjen. As të barazoj edhe as të mbrohem. Që të vegjël na e kanë injektuar në gjak pjesën e fitores dhe kjo është karakteristikë e futbollistëve të Tiranës. Gjithmonë me punë dhe me ndeshje të mirë. Edhe barazimi mund të jetë i mirë për momentin, por nuk është se do e pranoja kurrë.”
TEUTA – “Teuta pavarësisht humbjeve, kam parë që ka luajtur mirë. Ka lojtarë shumë cilësorë edhe është ekip shumë i fortë. Për sa i përket pjesës së lojës, Teuta ka shumë kualitet. Shpresoj që nesër të përballemi mirë dhe mendoj se e kemi përgatitur mirë ndeshjen.”
TIRANA E FAZËS SË TRETË – “Ekipi realisht më jepte garanci dhe jo më kot kemi fituar dhe ndaj ekipeve të kreut. Gjithsesi, ekipi më jep akoma garanci, pasi ndeshjet kanë qenë mjaft të mira. Thjesht ka munguar ajo pjesa e golit. Me një apo dy rezultate pozitive, ky ekip do të fillojë të mendojë përsëri ndryshe,” – ka deklaruar trajneri Ardian Mema i bardhebluve në konferencën e sotme të shtypit, në prag të ndeshjes me Teutën.
