Prishtina fiton derbin, ngjitet e dyta…
Prishtina është rikthyer në garën për titullin kampion në kampionatin IPKO të Superligës së Kosovës. Skuadra e trajnerit Mirel Josa tashmë renditet e dyta me 5 pikë nga Ferronikeli kryesues.
Derbi i kryeqytetit, takimi i prapambetur midis Prishtinës dhe Flamurtarit, që u zhvillua sot në stadiumin “Fadil Vokrri” të Prishtinës, ka folur i gjithi për skuadrën e Josës, e cila fitoi me lehtësi 3-0 ndaj rivalëve të tyre të kryeqytetit.
Fati i derbit u përcaktua qysh në 45 minutat e para. Fillimisht Meriton Korenica në minutën e 16-të dhe më pas Mario Morina në minutën e 22-të, shënuan në portën e Flamurtarit.
Fitoren do ta kompletonte sërish Korenica në pjesën e dytë, cili do të shënonte edhe një gol të dytë personal, duke fiksuar shifrat përfundimtare të derbit 3-0 për Prishtinën.
Pas kësaj fitoreje, skuadra e Prishtinës ngjitet në kuotën e 50 pikëve, duke pritur përballjen për t’u hakmarrë ndaj Ferronikelit, që aktualisht ka 5 pikë më shumë se kryeqytetasit në renditje.
