Krutanët: Duam pikë…
Kastrioti i 2019-ës nuk është më ai i dy fazave të para. Kur të gjithë e mendonin të rënë, presidënca mendoi se pjesa e mbetur e edicionit duhet provuar. Dhe ndryshimet në janar në staf e përbërje, e kanë tjetërsuar grupin e “kastriotëve”.
Pasi morën sinjale pozitive nga testet e minifazës, krutanët në 5 ndeshjët e fundit zyrtare, kanë arritur të grumbullojnë 10-pikë shprese. Rezultati? Pas shumë javësh, kanë lënë vëndin e fundit, duke u shkëputur nga Kamza që mbyll klasifikimin provizor me katër pikë. Pas këtij momenti pozitiv, qëndrimi në kategori, nuk shihet si rebus.
Ndërkaq, të dielën, krutanët do të udhëtojnë drejt Vlorës, për tu përballur me Flamurtarin, skuadër që së fundi është mbërthyer nga halle të ndryshme. Shumë largime, problematikë financiare në klub dhe ndëshkime nga trupa gjykuese të cilat në total, duket sikur e kanë turbulluar situatën kuq e zi.. Të bindur se nuk do të gjëjnë një grup në “këmbë’, por dhe shfrytëzuar momentin e tyre të mirë, krutanët do të tentojnë të përfitojnë maksimalisht dhe në fundjavë të tentojnë surprizën.
Skuadra sot, është stërvitur e plotë dhe nën diktatin e disiplinës tekniko-taktike të trajnerit gjirokastrit. Barazimi në derbi me bardhezinjtë fqinj javën e kaluar, prodhoi barazimin 1-1 duke e mbajtur lart moralin krutan. Autori I atij supergoli Julian Shehu, nuk do të jetë në forcë të skuadrës për transfertën vlonjate. Shehu, ka plotësuar numrin katër të kartonëve të verdhë, dhe do të jetë mungesa e vetme por e rëndësishme e formacionit të Devollit.